|
Umoderatioun: Am Numm vun der Regierung huet de Jean Asselborn haut um Conseil vun den Europaministeren hei um Kierchbierg schrëftlech festhale gelooss, datt een net d’accord ass mat der Recommandatioun vun der EU-Kommissioun, elo schonn e Gesetz ze stëmmen dat festhält, datt och no 2014 just eemol am Joer eng Indextranche wäert ausbezuelt ginn.
Lëtzebuerg hätt seng Responsabilitéit geholl andeems een am Januar légiféréiert hätt bis 2014. Doriwwer eraus misst d’Konjunktur da gekuckt ginn, an et wier dann och eng aner Regierung an der Verantwortung. Dës Positioun geet elo un d’Kommissioun, an un de Conseil européen op Bréissel.
Jean Asselborn (O-Toun): Hei kënne mir net forcéiert ginn. Et si Recommandatiounen. Allerdéngs musse mir wëssen, datt mir eis e wéineg do singulariséiert hunn. Mä ech fannen: sech singulariséieren, ofsetzen op enger, wéi ech gesot hunn, ganz sensibeler a sozialer Fro, domat brécht Europa net zesummen. Mir mussen natierlech och wëssen, datt mir an der Eurozon zumindest mat esou Froen an Zukunft méi staark wärte konfrontéiert ginn, wéi dat bis elo de Fall war.
|
